Policia greke ka arritur të zbardhë atentatin e ndodhur më 23 shtator të vitit të kaluar në Athinë, ku mbetën të plagosur dy shqiptarë.
Hetimet kanë treguar se sulmi ishte porositur nga burgu nga 48-vjeçari shqiptar Klod Cara, alias Klodian Lekocaj, i njohur si një figurë e fuqishme në botën e krimit në Greqi, i përfshirë në disa vrasje dhe ngjarje kriminale.
Ngjarja ndodhi në rrugën “Kriti 21” rreth orës 18:00, ku ndaj Kristjanis Stefës, 35 vjeç, nga Elbasani dhe Florian Bajraktarit, 37 vjeç, nga Tirana, u hap zjarr nga një fuoristradë tip “Nissan” Qashqai. Autorët u larguan menjëherë, duke lënë pas 7 gëzhoja në vendngjarje.
Pas pesë muaj hetime, policia identifikoi si ekzekutor Ledjon Çelën, 34 vjeç, nga Korça, i cili veproi në bashkëpunim me Mateo Nunajn, 23 vjeç, nga Lushnja, dhe Aleksandër Bakin, 24 vjeç.
Grupi kishte vjedhur automjetin e përdorur në atentat në një zonë tjetër të Athinës dhe e kishte përgatitur për sulmin.
Në ditën e ngjarjes, Nunaj drejtonte makinën, Baki ndodhej në sediljen e parë, ndërsa Çela, nga sedilja e pasme, hapi zjarr ndaj shënjestrave. Pas sulmit, ata braktisën mjetin dhe u larguan në këmbë.
Më 31 mars, Aleksandër Baki u arrestua dhe dha dëshmi që zbardhi dinamikën e ngjarjes. Ai pranoi se atentati ishte urdhëruar nga Lekocaj për shkak të një konflikti të mëparshëm me Stefën.
Policia greke ka vënë në pranga Aleksandër Bakin, Klodian Lekocajn dhe Ledjon Çelën, ndërsa Mateo Nunaj dyshohet se është arratisur drejt Shqipërisë.
Viktimat e atentatit, Stefa dhe Bajraktari, janë emra të njohur për drejtësinë.
Stefa ishte arrestuar në prill 2024 si pjesë e një grupi të përfshirë në trafik mallrash të vjedhura, ndërsa Bajraktari kishte precedentë për vrasje me pagesë dhe aktivitete të paligjshme.
Sa i përket autorëve, Ledjon Çela ka një dosje të ngarkuar kriminale në Shqipëri dhe Greqi, ku akuzohet për një sërë veprash penale, përfshirë zhvatje, dhunë, vjedhje, trafik droge dhe armëmbajtje pa leje.
Mateo Nunaj është i njohur për vjedhje dhe pjesëmarrje në organizata kriminale, ndërsa Aleksandër Baki ka precedentë për grabitje dhe trafik droge.
Klodian Lekocaj është një nga figurat më famëkeqe të botës së krimit në Greqi, i lidhur me grupe të fuqishme dhe vrasje me pagesë.
Ai akuzohet për urdhërimin e disa ekzekutimeve, përfshirë avokatin grek Mixalis Zafiropoulos, të burgosurit Arbër Bako dhe Bardhyl Tusha, si dhe për përfshirje në një sërë aktesh kriminale, duke përfshirë tentativën për të vrarë një pakistanez dhe gjobëvënie ndaj një ish-ministri grek.
Lekocaj ka një histori të gjatë me drejtësinë, që nga viti 1997, kur u arrestua për herë të parë për vjedhje. Ai është arratisur disa herë nga burgu dhe ka qenë pjesë e grupeve kriminale që kanë kryer vrasje, grabitje dhe trafik droge. Në vitin 2014, ai u arrestua në Athinë pas një serie krimesh të rënda, përfshirë një masakër me armë në një lokal.
Aktualisht, Lekocaj ndodhet në burgun e Malandrinos, ku vazhdon të hetohet për krime të tjera, përfshirë gjobëvënie dhe organizim atentatesh.
Ndërsa policia greke vazhdon operacionet për të kapur të arratisurit, ky rast ka hedhur dritë mbi një rrjet të gjerë të krimit të organizuar shqiptaro-grek, ku emra të njohur të botës së krimit kanë pasur një ndikim të madh në skenën kriminale të vendit fqinj.