Një 28-vjeçar i kërkuar nga autoritetet spanjolle është arrestuar nga forcat operacionale shqiptare gjatë aksionit të koduar “Operacionalja 45”.
Elton Kola u kap në lëvizje, në segmentin rrugor “Vau i Dejës–Shkodër”, pas një operacioni të koordinuar me partnerët spanjollë dhe INTERPOL-in.
Ai ishte shpallur në kërkim ndërkombëtar nga drejtësia e Barcelonës, e cila kishte lëshuar një urdhër arresti me masën “arrest në burg”. Kola akuzohet për kultivim të bimëve narkotike dhe vjedhje të energjisë elektrike.
Sipas hetimeve, ai dyshohet se kishte ngritur në Spanjë një nga të ashtuquajturat “shtëpi bari”, ku kultivonte kanabis me ndihmën e llambave dhe pajisjeve elektrike të vjedhura.
Operacioni vjen si pjesë e bashkëpunimit të vazhdueshëm mes Policisë së Shtetit dhe autoriteteve ndërkombëtare për kapjen e personave në kërkim jashtë territorit.
Njoftimi i Policisë:
Si rezultat i koordinimit të punës dhe shkëmbimit të informacioneve, me partnerët spanjollë, nëpërmjet INTERPOL, shërbimet e Drejtorisë së Forcës së Posaçme Operacionale, në kuadër të operacionit “Operacionalja 45”, lokalizuan, kapën dhe vunë në pranga, me qëllim ekstradimin në Spanjë, shtetasin E. K., 28 vjeç, të lindur në Shkodër.
Ai kërkohej ndërkombëtarisht, sepse Gjykata e Barcelonës, në vitin 2025, i ka caktuar masën e sigurisë “Arrest në burg”, për kultivim të bimëve narkotike dhe vjedhje të energjisë elektrike.
Interpol Tirana po bashkëpunon me Interpol Madridin, për të finalizuar ekstradimin e këtij shtetasi.
