Universiteti “La Sapienza” në Romë i ka dedikuar Ilaria Sulës, 22-vjeçares shqiptare të vrarë mizorisht nga ish-i dashuri, hapësirat e reja të studimit në ambientet e ish-klubit rekreativ brenda kampusit.
Ilaria ishte studente në Fakultetin e Shkencave Statistikore dhe u bë simbol i dhimbjes për dhunën ndaj grave.
Ceremonia përkujtimore u zhvillua në praninë e rektores Antonella Polimeni, familjarëve të Ilarias prindërve dhe vëllait të saj të cilët zbuluan pllakën përkujtimore në nder të saj.
Në të shkruhej: “Ilaria Sula, studente e Sapienzës, për të mos harruar të gjitha gratë viktima të femicideve, të cilave u është prerë e ardhmja”.
Kjo nismë u organizua në kuadër të përvjetorëve historikë të universitetit – 722 vite nga themelimi i tij më 20 prill 1303 nga Papa Bonifaci VIII dhe 90 vite nga ndërtimi i qytetit universitar më 31 mars 1935.
Ilaria u zhduk më 25 mars dhe u gjet e vdekur më 2 prill, brenda një valixheje. Ish-i dashuri i saj, Mark Samson, rrëfeu vrasjen: ai e kishte goditur për vdekje me thikë në banesë, përpara se të fshihte trupin e saj. Trupi u gjet nga policia pas disa ditësh kërkimesh.
