Ministrja e Kulturës, Elva Margariti e ka mohuar faktin që UNESCO ka kërkuar që punimet në bypass-in e Gjirokastrës të ndalen, për shkak se “skicon një situatë shumë shqetësuese të projektit”
Në një vizitë në qytetin e gurtë gjatë ditës së sotme, Margariti tha se UNESCO nuk është shprehur se ka kërkuar pezullimin e punimeve, por duan të sjellin ekspertë për monitorimin e punës. Më tej ministrja shtoi edhe se sipas rekomandimeve të UNESCO-së do bëhet e mundur që në qendrën historike të mos kalojnë më makina.
Deklarata e Margaritit:
Në këtë rast në fillim të qershorit kemi pasur një komunikim për të gjithë planin e menaxhimit që dërgojmë në UNESCO si për Beratin, por edhe për Gjirokastrën. Ata nuk janë shprehur se donin pezullimin e punimeve sepse bie ndesh me vlerat e shtuara, por duan të sjellin ekspertëve të tyre për monitorim të punimeve të cilat po kryhen.
Zgjidhja që ne kemi propozuar në UNESCO lidhet me shumë problematika të tjera të qytetarëve, në rastin konkret me përroin e Nanxës i cili ka problematike me pjesën e erozionit.
Po ashtu kemi integruar një tjetër projekt atë të restaurimit të urave të vjetra për të lidhur një tjetër unazë pedonale që kemi menduar t’i shtohet qytetit. Në fokusin tonë dhe nga rekomandimet e lëna nga UNESCO ne duhet të bëjmë të mundur që qendra historike të mos jetë më një hapësirë ku të kalohen makina.
Ndaj edhe rasti i parkimi të sheshit të Çerçizit shkon pikërisht në vijim të rekomandimeve të tyre. Faza në të cilën ne jemi është totalisht emergjente dhe është një fazë përgatitore për projektin që do të vijë më pas dhe patjetër ne do të presim edhe rekomandimet nga UNESCO.
Por çfarë ka thënë UNESCO për punimet në Gjirokastër?
Jo vetëm që nuk ka kërkuar që punimet të vazhdojnë, por UNESCO ka kërkuar që projekti të ndalohet deri sa një mision të vlerësojë ndikimin e tij.
“Informacionet e palëve të treta të marra nga Qendra e Trashëgimisë Botërore përfshijnë dokumentacion që skicon një situatë shumë shqetësuese të projektit, e cila duket se është tashmë në ndërtim. Dizajni i transmetuar nënkupton që projekti të ketë një ndikim të mundshëm negativ në vlerat e përbashkëta të pronës. Kjo kërkon verifikim nga qeveria dhe rekomandohet që Komiteti ti kërkojë qeverisë të ndalojë këtë projekt derisa një mision të vlerësojë ndikimin e tij në vlerat e përbashkëta të pronën dhe të bëjë rekomandimet”, thuhej në reagimin e UNESCO.
Qeveria shqiptare i ka publikuar planet për projektin e bypass-t në Gjirokastër që në vitin 2016. Synimi ishte që të devijohej qarkullimi i automjeteve nga zona muzeale dhe Qafa e Pazarit, si destinacione kryesore turistike. Që në fillimet e veta projekti ka hasur në kundërshtime të ashpra si nga specialistët, ashtu edhe nga UNESCO, për shkak se cenon vlerët natyrore të qytetit dhe vendi ku bypass-i do të kalonte u cilësua si i papërshtatshëm për shkak të paqëndrueshmërisë së tokës. Megjithatë qeveria shqiptare nuk i mori parasysh rekomandimet dhe i vijoi punimet.
