Në Kosovë numri i të infektuarve dhe viktimave nga Covid-19 është drejt rënies dhe kjo ka bërë që edhe masat kufizuese të ndryshojnë. Mësohet se ora policore do të hiqet në të gjitha komunat e vendit dhe do të zgjatet orari i punës për lokalet e gastronomisë nga ora 20:00 sa është tani, deri në orën 21:00 ose 22:00. Gjithashtu, do të lejohet dhe veprimtaria e tregjeve publike të automjeteve.
Sipas mediave vendase nuk do të lejohen grumbullimet e qytetarëve dhe tubimet publike me më shumë se 30 persona.
Drejtori i Asociacionit të Komunave të Kosovës, Sazan Ibrahimi, ka deklaruar se pas rënies së numrit të rasteve pozitive dhe kalimit të shumicës së komunave nga zona e kuqe në zonën e verdhë apo të gjelbër, ka ardhur momenti për lehtësim të masave.
“Pasi shumica e komunave të cilat kanë qenë të kategorizuara në zonën e kuqe kanë kaluar në zona të verdha apo të gjelbërta dhe duke marrë parasysh që këto masa kanë dhënë rezultate pozitive, pasi numri i rasteve pozitive është në rënie e sipër, po ashtu pasi masat nuk janë rishqyrtuar për një kohë të caktuar, mendojmë se ka ardhur momenti që të ftohet takimi ndërinstitucional për rishqyrtim të masave. ”, ka deklaruar Ibrahimi.
