Pas përfundimit të kontratës koncesionare për pullat fiskale, qeveria ka miratuar tarifa të reja me një ulje deri në 25%. Sipas vendimit të publikuar në Fletoren Zyrtare, bizneset që operojnë me mallra të akcizës do të kenë një kosto më të ulët për pullat fiskale.
• Duhani: 15.65 euro për 1,000 pulla (nga 20 euro më parë)
• Vera: 25.04 euro për 1,000 pulla
• Birra: 17.22 euro për 1,000 pulla (nga 22 euro më parë)
• Alkooli: 25.05 euro për 1,000 pulla (nga 32 euro më parë)
Pullat e reja fiskale do të përmbajnë elemente sigurie si sfondet speciale, tekst të imët, efekte me ndryshim ngjyre dhe kode të dukshme e të padukshme. Gjithashtu, ato do të jenë rezistente ndaj ndërhyrjeve dhe të verifikueshme nga konsumatorët.
Procesi i prodhimit dhe shpërndarjes së pullave fiskale do të kryhet nga një shoqëri shqiptaro-arabe, e regjistruar në Qendrën Kombëtare të Biznesit dhe që do të funksionojë nën administrimin e Shtypshkronjës së Letrave me Vlerë.
Pullat e reja do të fillojnë shpërndarjen nga muaji prill, ndërsa deri më 31 mars bizneset do të përdorin pullat e vjetra të prodhuara nga kompania koncesionare.
Kjo lëvizje vjen pas angazhimit të qeverisë për uljen e kostove të biznesit dhe eliminimin e skemës koncesionare që ishte në fuqi prej vitit 2012.
