Për herë të parë pas më shumë se tre vjetësh, delegacionet e Rusisë dhe Ukrainës do të takohen në bisedime të drejtpërdrejta për paqe, të cilat do të zhvillohen më 15 maj në Pallatin Dolmabahçe, Stamboll.
Bisedimet do të jenë me dyer të mbyllura dhe në nivel teknik, ndërsa liderët kryesorë ,Vladimir Putin dhe Volodymyr Zelensky nuk do të jenë të pranishëm.
Sipas mediave ruse, delegacioni rus do të drejtohet nga këshilltari i Kremlinit, Vladimir Medinsky, një figurë e njohur për promovimin e tezave historike nacionaliste dhe pretendimeve të Moskës ndaj territorit ukrainas.
Pjesë e delegacionit do të jenë gjithashtu zëvendësministri i Mbrojtjes, Aleksandr Fomin, dhe kreu i inteligjencës ushtarake (GRU), Igor Kostyukov.
Nga pala ukrainase, ndërsa presidenti Zelensky udhëtoi drejt Turqisë, ai nuk do të marrë pjesë në takimet në Stamboll, por do të zhvillojë një takim më vete me presidentin Erdogan në Ankara.
Zelensky ka theksuar më herët se është i gatshëm të bisedojë vetëm me Putinin, duke e refuzuar përfshirjen në diskutime me zyrtarë të nivelit më të ulët.
Nga ana tjetër, përfaqësues amerikanë si Steve Witkoff dhe Keith Kellogg pritet të jenë të pranishëm në Stamboll, por nuk është konfirmuar ndonjë rol udhëheqës nga Uashingtoni.
Presidenti Donald Trump, i cili ndodhet në një turne në Lindjen e Mesme, kishte shprehur gatishmëri për të marrë pjesë nëse kjo do të bindte Putinin, por përfundimisht nuk do të jetë pjesë e takimit.
Skepticizmi për suksesin e bisedimeve është i theksuar. Ambasadori lituanez në Suedi, Linas Linkevičius, e konsideroi procesin si një manovër për të zvarritur kohën dhe për të përgatitur terrenin për një ofensivë të re ruse gjatë verës. Ai theksoi se nuk mund të ketë paqe pa përgjegjësi ligjore për krimet e luftës dhe pa respektim të sovranitetit ukrainas.
Ndërkohë, në terren, Rusia ka intensifikuar sulmet ndaj Ukrainës, me dronë dhe raketa, përfshirë goditje në qytetin Sumy, ku tre persona humbën jetën më 14 maj.
Kjo valë e dhunës vjen në një moment kur diskutimet për armëpushim janë sërish në tryezë, por pa garanci reale për përparim konkret./ REL
