Është arrestuar nga policia këngëtari i njohur, Aleksandër Gjoka. Lajmin e bën të ditur News 24, sipas së cilës Gjoka është përfshirë në një aksident automobilistik në zonën e “Farkës” dhe pas kryerjes së procedurave nga policia ka rezultuar i dehur.
Mësohet se këngëtari ndodhet në spital jashtë rrezikut për jetën dhe ruhet nga forcat e policisë, për shkak se i është komunikuar masa e arrestit.
“Specialistët e Qarkullimit Rrugor bënë arrestimin në flagrancë të shtetasve: R. P., A. Sh., B. M., E. Z., dhe A. Gj., pasi u kapën duke drejtuar mjetet përkatëse në gjendje të dehur.”, -thuhet në njoftimin e shkurtër të policisë.
Kujtojmë se kjo nuk është hera e parë që këngëtari Aleksandër Gjoka futet në telashe me policinë. Më 23 dhjetor të vitit 2019 këngëtari u arrestua për të njëjtën arsye, pra se drejtonte mjetin në gjendje të dehur. Arrestimi i tij 2 vite më parë u bë në rrugën “Sotir Caci” dhe është ndaluar nga shërbimet e Komisariatit të Policisë Nr.4. Pas testit të alkoolit që i bëri policia, Gjoka rezultoi se drejtonte mjetin në gjendje të dehur në masën 0.66 mg.l.
“Arrestimi i tij u bë pasi më datën 23.12.2019, rreth orës 00.15, është ndaluar nga shërbimet e Komisariatit të Policisë Nr 4 në rrugën “Sotir Caci” duke drejtuar mjetin veturë, tip ‘Chevrolet”.
Pas testimit me aparat “Drager”, nga shërbimet e Policisë Rrugore rezultoi se ky shtetas drejtonte mjetin në gjendje të dehur në masën 0.66 mg/l”, thuhet në njoftimin e para dy viteve
