Ditën e dielë stuhia Ciara mbërtheu Britaninë e Madhe, duke shkaktuar përmbytje dhe bllokimin e qarkullimit për disa orë.
Shpejtësia më e lartë e erës së regjistruar ishte 150 kilometra në orë në fshatin veriperëndimor Uells të Aberdaron.
Një ditë më vonë, Ciara la Mbretërinë e Bashkuar dhe ka goditur vende të tjera të Europës, duke u përhapur me shpejtësi në kontinent.
Bëhet me dije se qindra fluturime dhe udhëtime me tren janë anuluar në Europën veri-perëndimore.
Stuhia u njoftua se do “godiste” edhe vendin tonë ditën e mërkurën, 12 shkurt, por kjo ditë u mbyll me mot të qëndrueshëm dhe vranësira.
Edhe dita e nesërme parashikohet me të njëjtat kushte atmosferike, ku mëngjeso do të mbizotërohet nga vranësirat, ndërsa pas mesditës moti do përmirësohet.
Gjatë mbrëmjes parashikohet të kemi shtim të vranësirave, ku më të theksuara do të jenë në zonat Veriore të Shqipërisë.
Sa i përket temperaturave të ajrit, ato do të ulen në mëngjes, por do pësojnë sërish rritje në mesditë duke u luhatur në vlerat nga -2°C deri në 17°C.
Era do fryjë e lehtë në tokë dhe mesatare në det me shpejtësi 35 km/h nga drejtimi Jugor duke krijuar në det dallgëzimi deri në 3 ballë.
