Ndarja e Shakirës nga Gerard Piqué ka marrë një vëmendje të lartë mediatike në të gjithë botën. Këngëtarja e prekur nga tradhëtia e ish-partnerit të saj, ‘shfrytëzoi’ muzikën për të nxjerrë mllefin e saj.
Më në fund Pique ka folur rreth kësaj çështje duke thyer heshtjen. Në një bisedë me prezantuesin Jordi Basté, për radiostacionin katalanas ‘Rac1’, spanjoli ka reflektuar mbi gjithçka ka ndodhur me këngëtaren kolumbiane.
“Njerëzit nuk e dinë as 10% se çfarë ka ndodhur realisht”,- tha ish-qendërmbrojtësi për ndarjen e tyre. Ai gjithashtu u shprehse “njerëzit bazohen në informacione që kryesisht nuk janë reale”.
“Po t’i kisha dhënë rëndësi gjithçkaje që thuhej për mua, do të isha mbyllur në banesën time, ose do të isha hedhur nga dhoma e gjumit… E vetmja mënyrë për të dalë i gjallë nga e gjithë kjo është të mos i kushtosh rëndësi çdo gjë”,- tha Pique.
Katalanasi deklaroi gjithashtu se tani ai nuk duhet të mendojë për çështje të tjera përtej marrëdhënies me partneren e tij aktuale Clara Chía, projektet e tij profesionale dhe mbajtjen private të jetës së tij personale. Për të përfunduar, ai e cilësoi si “cirk” gjithçka që ndodhi pas ndarjes nga Shakira, edhe pse thotë se është i vetëdijshëm se “është pjesë e spektaklit” pasi është personazh mediatik.
