“Atij nuk i pëlqente të quhej hero. Terry Anderson vdiq dje, në moshën 76-vjeçare, në shtëpinë e tij në Greenwood Lake, Nju Jork,”-kështu u dha lajmi për ndarjen nga jeta të gazetarit amerikan. Anderson ishte korrespondenti kryesor i Associated Press për Lindjen e Mesme kur u rrëmbye nga kryengritësit islamikë, anëtarë të Hezbollahut, në vitin 1985.
Incidenti që ndryshoi në mënyrë drastike botëkuptimin e gazetarit amerikan ndodhi në mars të vitit 1985.
Gazetari amerikan kishte mbuluar luftën civile në Liban për Associated Press për tre vjet, kur disa persona të armatosur e kapën në një rrugë në Bejrut, e hodhën në bagazhin e një makine dhe e çuan në një vend të panjohur. “Kalvari” i tij përfundoi në dhjetor 1991, pas përfundimit të luftës civile. Ajo që e mbajti gjallë gjatë gjithë viteve të tij si peng, ishin shoqëruesit e tij.
“Isha me fat që të kisha të tjerë me vete shumicën e kohës. Besimi im, kokëfortësia ime, mendoj, luajtën një rol në faktin që mbeta gjallë.Zgjohesh çdo ditë dhe merr energji nga diku, edhe kur mendon se nuk e ke dhe kështu shkon dita. Dhe ju bëni të njëjtën ditë pas dite.”
Me kalimin e kohës, u zbulua se rrëmbyesit e Terry Anderson ishin anëtarë të grupit mysliman shiit Hezbollah të mbështetur nga Irani. Ata e rrëmbyen gazetarin si hakmarrje për përdorimin e armëve amerikane dhe ndihmën e Izraelit në sulmet e viteve 1982–1983 kundër myslimanëve në Liban. Pas lirimit të tij, Anderson dha mësime për gazetari në kolegje të ndryshme amerikane, duke përfshirë Universitetin e Columbias në Nju Jork, përpara se të tërhiqej si pedagog vitin 2015.
Ai shkroi gjithashtu një autobiografi “Den of Lions” (Zgavra e luanit), në të cilën ai tregon detaje për periudhën kur mbahej peng.
