Kryeministri Edi Rama edhe pse nuk ishte i pranishëm në panairin e verës të “Open Balkan” që u mbajt para dy ditësh në Serbi ka zgjedhur të dërgojë një videomesazh homologëve të tij, kryesisht nismëtarit Aleksandër Vuçiç.
Rama në videomesazhin e tij theksoi se në rajon duhet që të ndërtohen ura bashkëpunimi. Po ashtu Rama shtoi se prania e presidentit të ri malazez Milatoviç në këtë event dëshmon natyrën konstruktive e gjithëpërfshirëse të kësaj iniciative.
“Miqtë e mi të dashur do të kisha dëshiruar që të isha me ju në këtë event ku veçanërisht dua që të falenderoj për praninë e tij presidentin e ri malazez. Prezenca e tij dëshmon natyrën konstruktive e gjithpërfshirëse të iniciativës sonë. Shtetet e rajonit duhet të ndërlidhen dhe në të ardhmen të ndërtojë marrëdhënie të mira fqinjësore në një vend ku të gjithë të jetojnë së bashku. Ne kemi mësuar se ndarjet e së kaluarës mund të pengojnë të tashmen dhe të ardhmen e Ballkanit Perëndimor. Jam i bindur se e ardhmja jonë duhet të jetë e ndryshme nga e kaluara dhe e tashmja. Pyetja nuk është nëse, por kur. Unë jam i përkushtuar që të jap kontributin tim për këtë qëllim. Shtetet e Ballkanit Perëndimor janë krijuar për të ekzistuar krah për krah ndaj ky rajon duhet transformuar për gjeneratat e reja. Të ndërlidhim vendet tona me botën, por të mos lidhemi me njëri-tjetrin është dritëshkurtër. Le të mësojmë nga gabimet e të tjerëve dhe të mos i përsërisim ato. Le të punojmë së bashku dhe ta kthejmë rajonin në një vend ku fëmijët tanë do të jetojnë së bashku,” mësohet se ka thënë Rama në videomesazh.
Vetëm një muaj më parë Rama priti Procesin e Berlinit në Tiranë dhe nismën e Ballkanit të Hapur e konsideroi vetëm si një mjet që i shërben Procesit të Berlinit dhe se e ka kryer punën e tij. Por, mesa duket Rama ka zgjedhur të jetë i përkushtuar që nisma e Open Balkan të ecë para. Theksojmë se ky mesazh është mbajtur i fshehur mediave shqiptare.
