Një javë më parë, deputeti demokrat dhe njëherazi kryetari i Kuvendit, Myslim Murrizi, quajti daun një komentues gjatë një debati në rrjetet sociale.
Termi i përdorur nga Murrizi ngjalli reagime të shumta nga institucioni i Avokatit të Popullit, shoqëria civile dhe shoqatat e personave me aftësi të kufizuara.
Ditën e sotme në Parlament, Murrizi kërkoi falje për të gjithë të prekurit nga fjalët e tij, shkruan “Balkanweb”.
Më tej ai hodhi akuza në drejtim të shoqatave, që marrin fonde dhe nuk ofrojnë asnjë ndihmë, për personat me aftësi të kufizuara.
“Keqardhje për lëndimin qe kam shkaktuar. Kërkoj falje publike për të gjithë të indinjuarit. Ndjesë për termin e përdorur në ‘Facebook’. Ndjese edhe shoqatës se fermerëve për termin “pjeshkëz”, -tha Murrizi.
Ndërkohë ditën e djeshme, anëtarë të shoqërisë civile dhe përfaqësues të fondacionit për trajtimin e fëmijëve me sindromën daun, protestuan përpara Kuvendit dhe kërkuan nga Murrizi që të bënte një falje publike.
