Kreu i Kuvendit të Shqipërisë, Gramoz Ruçi iu drejtua me anë të një letre më 2 prill, të gjitha institucioneve të pavarura kushtetuese dhe atyre të krijuara me ligj, për të përgjysmuar pagën për një periudhë 3 mujore.
Zyra e shtypit pranë Kuvendit, ka bërë publike institucionet dhe personat që iu përgjigjën poztivisht thirrjes së Ruçit, duke u solidarizuar me situatën e krijuar për shkak të COVID-19.
Në Bankën e Shqipërisë, thirrjes iu përgjigjën Guvernatori Gent Sejko dhe anëtarët e Këshillit Mbikëqyrës.
Gjithashtu Prokurori i Përgjithshëm, Olsian Çela, përgjysmoi pagën dhe u bëri thirrje vartësve të tij të ndjekin të njëjtën rrugë.
Me situatën është solidarizuar edhe kreu i Kontrollit të Lartë të Shtetit, Bujar Leskaj, i cili përgjysmoi pagën deri në fund të 2020-ës.
Pozitivisht thirrjes së Ruçit iu përgjigjën anëtarët e Këshillit të Lartë Gjyqësor; Naureda Llagami, Ilir Toska, Brikena Ukperaj, Dritan Hallunaj, Erjon Muharremaj dhe Fatmira Luli.
KLGJ ndërkohë ia përcolli thirrjen e Kreut të Kuvendit, të gjithë gjykatave.
Titullarët e tjerë që iu përgjigjën pozitivisht thirrjes së Ruçit janë; Avokatia e Popullit Erinda Ballanca, Këshilli Lartë i Prokurorisë,Inspektori i Lartë i Deklarimit dhe Kontrollit të Pasurive dhe i Konfliktit të Interesit, Shkëlqim Ganaj, Autoriteti i Mediave Audioviozive, Kryetari i Autoriteti i Mbikëqyrjes Financiare, Ervin Koçi; Kryetarja e Autoritetit të Konkurrencës Juliana Latifi; Komisionerja për Mbikqyrjen e Shërbimit Civil, Pranvera Strakosha; Kryetari i Entit Rregullator të Energjisë Elektrike, Petrit Ahmeti; Kryetari i Agjencisë së Sigurimit të Depozitave, Donald Duraj; Drejtuese e komanduar e Institutit të Statistikave, Elsa Dhuli dhe anëtarja e Komisionit të Prokurimit Publik, Lindita Skeja.
