Detaje të reja janë zbuluar lidhur me 300 mijë eurot e sekuestruara ditën e djeshme në Durrës. Dyshohet se paratë i përkasin grupeve kriminale që merren me trafikun e drogës në Italinë e Veriut. Kjo pasi mësohet se destinacioni i kamionit ishte qyteti i Bergamos, ku edhe do të ndalonte për të shkarkuar “mallin” dhe për të marrë paratë, që do t’ua dorëzonte pronarëve në Shqipëri.
Ferdinand Murikaj është prangosur në flagrancë, ndërsa Erjon Jovani, 36 vjeç, pronari i kamionit kur edhe ndodheshin paratë është shpallur në kërkim. Ky i fundit edhe më parë ka qënë i proceduar penalisht, pasi tentoi që të kalonte në Itali 4 vite më parë 190 kg kanabis.
I pyetur nga Policia lidhur me kamionin me para, Murikaj ka dëshmuar se nuk kishin asnjë ide se brenda kamionit fshiheshin para. Sipas tij, kamioni është shkarkuar në Bergamo dhe si destinacion në Shqipëri, kishte Lushnjën.
Ky qytet u përmend së fundmi edhe si vendi ku u ngarkuan 2.6 ton kanabis brenda kamionit, i cili u kap në Mal të Zi.
Njoftimi i policisë dje:
Port, Durrës
Bashkëpunimi dhe koordinimi i veprimeve mes Policisë Kufitare dhe strukturave doganore çoi në sekuestrimin e një sasie të madhe në euro.
Sekuestrohen 294 030 euro.
Arrestohet në flagrancë 1 drejtues mjeti, procedohet penalisht 1 tjetër.
Shpallet në kërkim pronari i firmës që merrej me transportin e mjeteve.
Shërbimet e Policisë Kufitare, në zbatim të masave për parandalimin dhe goditjen e krimeve ndërkufitare në bashkëpunim me strukturat doganore, kanë intensifikuar kontrrollet si në dalje, ashtu dhe në hyrje, në Portin e Durrësit.
Si rezultat i kontrolleve të shtuara bazuar dhe në analizën e riskut të bërë nga shërbimet e Policisë në PKK Durrës në bashkëpunim me strukturat doganore, janë kaluar në vijën e dytë për kontrroll të imtësishëm 2 mjete tip kamion, të cilët transportonin mjete Itali-Shqipëri, me drejtues shtetasit F. M., dhe A. L.
Specialistët për Hetimin e Krimit Ekonomik dhe Financiar në DVP, shërbimet e Policisë Kufitare dhe strukturat doganore, nën drejtimin e Prokurorisë së Rrethit Gjyqësor Durrës, gjatë kontrollit në automjetin me drejtues shtetasin F. M., gjetën të fshehura në pjesë të ndryshme të mjetit një sasi vlere monetare prej 282 265 eurosh.
Në vijim të veprimeve u arrestua në flagrancë shtetasi F. M., 29 vjeç, banues në Lezhë, për veprën penale “Mosdeklarimi i të hollave dhe sendeve me vlerë në kufi”.
Shërbimet e Policisë kanë vijuar me kontrollin e automjetit tjetër me drejtues shtetasin A. L., ku në çantën personale të tij, u gjetën dhe sekuestruan në cilësinë e provës materiale, një sasi vlere monetare prej 11 765 eurosh.
Specialistët për Hetimin e Krimit Ekonomik dhe Financiar, proceduan penalisht shtetasin A. L., 34 vjeç, banues në Lushnjë, për veprën penale “Mosdeklarimi i të hollave dhe sendeve me vlerë në kufi”.
Po në vijim të veprimeve u bë shpallja në kërkim e shtetasit E. J., 36 vjeç, (pronari i firmës që bënte transportin e mjeteve), për veprën penale “Pastrimi i produkteve të veprës penale ose veprimtarisë kriminale”.
Materialet i kaluan Prokurorisë së Rrethit Gjyqësor Durrës, për veprime të mëtejshme.
