Ajo u kap me armë në makinë por duket se problemet e saj me drejtësinë tashmë do të marrin një tjetër rrjedhë.
Gjithsesi këngëtarja nga Kosova, Fjolla Morina, ka arritur që të fusë në sherr përfaqësuesit e Prokurorisë në Kukës, të cilët janë ndarë në mendime dhe vendime në lidhje me këngëtaren “rebele”.
Drejtuesja e Prokurorisë së Kukësit ka dalë kundër prokurorit të çështjes dhe kërkoi që këngëtarja të gjykohet për “trafik armësh në bashkëpunim”, me dy të tjerët, biznesmenin Fisnik Syla dhe shoferin Fitim Muja.
Por kjo kërkesë ka hasur në kundërshtimin e prokurorit, i cili e ka regjistruar çështjen e Morinës vetëm për veprën penale “armëmbajtje pa leje”.
Prokurori, Mujan dhe Sylën, ai i ka lënë jashtë dosjes, duke pushuar akuzat. Nuk dihet se si do të shkojë deri në fund kjo çështje, ndërkohë që nga ana tjetër, këngëtarja vijon planet për dasmën me Sylën.
Këngëtarja Fjolla Morina, u arrestua më 19 shtator në pikën doganore të së cilës i mban mbiemrin, teksa po kalonte në pikën kufitare me armë zjarri në makinë bashkë me të dashurin e saj tashmë të deklaruar, Fisnik Sylla dhe shoferin Fitim Muja.
Ajo po udhëtonte në makinën e saj, tip “Audi Q7”, bashkë me biznesmenin nga Kosova me vendbanim në Belgjikë, Fisnik Syla.
Asaj iu gjetën dy armë me vete, njëra brenda në çantë, ndërsa tjetra, në bagazh. Pas ekspertizës, u konstatua se njëra ishte armë zjarri, ndërsa tjetra, çakmak. Pas arrestimit Morina pranoi pronësinë e armës, që ndodhej në makinë dhe tha se, dy personat që e shoqëronin, nuk kishin lidhje me pistoletën dhe nuk kishin dijeni.
Ajo tha se, armën tip “Zoraki”, ia kishte dhuruar një miku i saj në Gjermani, që nuk jeton më. Kjo ngjarje, solli edhe bërjen publike të historisë së dashurës së Morinës me Sylën.
Dyshja po kalojnë bashkë periudhën që këngëtarja është vendosur në ‘arrest shtëpie” në Kukës.
/GazetaReforma.com/
