12 rastet e reja të COVID-19 në qytetin e Fierit, erdhën pas kontakteve në dasma dhe plazhe.
Burimet për “Dosja.al” bëjnë me dije se 11 prej të infektuarve e kanë marrë virusin nga plazhet, pasi shumica kanë qenë me pushime, dhe dasmat që kanë frekuentuar ditët e fundit, të cilat edhe pse nuk lejohen, nuk kanë munguar.
Njëri prej të infektuarve rezulton të jetë një futbollist, që është infektuar në Tiranë, ku ka dhënë disa provime.
Futbollisti, 30 vjeç, identiteti i të cilit nuk bëhet me dije, mësohet se është pjesë e ekipit “Albpetrol”, dhe vetëm pak ditë më parë ka luajtur në një ndeshje në Librazhd, me ekipin e tij.
Pesë anëtarët e familjes së tij janë karantinuar, edhe pse nuk kanë shfaqur simptoma. Fieri numëron 129 të sëmurë aktivë që nga fillimi i pandemisë.
Sot, është shënuar një rekord të ri të rasteve të reja të infektuar me COVID-19. 140 është numri i personave që janë konfirmuar pozitiv me koronavirus gjatë 24 orëve të fundit, ndërsa fatkeqësisht 5 persona të tjerë kanë humbur jetën, duke e çuar në total numrin e viktimave në 205.
