Është hedhur këtë të martë shorti për fazën “Final 4” të Superligës, turneu përmbyllës që do të vendosë kampionen e re të Shqipërisë në futboll.
Katër skuadrat më të mira të sezonit të rregullt do të përballen në një mini-turne me ndeshje direkte në stadiumin “Arena Kombëtare” në Tiranë.
Federata Shqiptare e Futbollit ka ndarë ekipet në dy vazo:në të parën, Egnatia dhe Vllaznia, si dy skuadrat e para në renditje; në të dytën, Dinamo dhe Partizani.
Nga shorti i hedhur dolën këto çifte gjysmëfinale:
• 4 maj: Vllaznia – Dinamo
• 5 maj: Egnatia – Partizani
Finalja për vendin e tretë do të luhet më 9 maj, ndërsa titulli kampion do të vendoset më 12 maj, në finalen e madhe.
Sipas formatit të ri të “Final 4”, dy skuadrat më të larta në renditje, Egnatia dhe Vllaznia, kalojnë në finale edhe nëse barazojnë në ndeshjet gjysmëfinale, një avantazh i qartë për përfundimin e tyre në vendet 1 dhe 2.
Kualifikimi në Evropë dhe shpërblimet:
• Fituesja e kampionatit do të përfaqësojë Shqipërinë në raundin e parë kualifikues të UEFA Champions League.
• Tre skuadrat e tjera do të marrin pjesë në raundin e parë të UEFA Conference League.
Vlen të theksohet se përballja mes Egnatias dhe Partizanit është një rikthim i finales së sezonit të kaluar, ku skuadra nga Rrogozhina doli kampione.
