Detaje të reja kanë dalë në dritë lidhur me vrasjen në mënyre makabre të çiftit Pasho në Itali. Djali i bashkëshortëve të ndjerë shqiptarë, Shpëtimi dhe Teuta Pasho, Taulant Pasho ka dhënë detaje të reja që mund të ndihmojnë autoritet në zbardhjen e kësaj ngjarje të rëndë.
Sipas asaj që shkruajnë mediat italiane, gjatë marrjes në pyetje Taulant Pasho ka thënë se prindërit e tij mbanin me vete një shumë parash, që arrinte në disa dhjetëra, mijëra euro. Me zhdukjen e çiftit janë zhdukur edhe paratë që ata kishin me vete në mënyrë misterioze.
Taulant Pasho, 33 vjeç, i cili momentalisht ndodhet në burgun e Como ku po vuan dënimin për një tjetër akuzë, gjithashtu i ka dhënë përgjigje një sërë pyetjeve që i janë bërë në lidhje me ish-të dashurën e tij Elona Kalesha, e cila u hetua me të për vdekjen e çiftit së bashku me vëllain e saj Denis Kalesha.
Ai ka thënë se ka marrë përsëri nga Elona Kalesha, disa ditë pas zhdukjes së prindërve të tij, një shumë që ai i kishte dhënë asaj hua, që arrinte në disa mijëra euro.
Kujtojmë se eshtrat e çiftit shqiptar u gjetën dhjetorin e kaluar në disa valixhe të braktisura në buzë të një toke ngjitur me burgun Sollicciano, por ende nuk ka një autor të arrestuar.
