Një i paraburgosur ka humbur jetën në orët e para të mëngjesit të sotëm në ambientet e QSUT-së.
Viktima është shtetasi Besnik Koçiu, 49 vjeç, i cili ndodhej në qendrën e paraburgimit “Jordan Misja” në Tiranë që prej datës 16 korrik, pasi ishte transferuar nga Drejtoria e Policisë së Tiranës. Ai ishte në hetim për veprat penale “Armëmbajtje pa leje” dhe “Prodhim i armëve”.
Rreth orës 07:00 të mëngjesit të datës 24 korrik, personeli infermieror i burgut u njoftua se Koçiu ishte pa ndjenja në qelinë e tij.
Ai u transportua me urgjencë në QSUT, ku mbërriti në orën 07:12 dhe iu nënshtrua menjëherë ndërhyrjeve mjekësore, por fatkeqësisht ndërroi jetë një orë më pas.
Sipas të dhënave mjekësore, Koçiu vuante nga disa sëmundje kronike, përfshirë diabetin, hipertensionin dhe një goditje ishemike të mëparshme, për të cilat kishte ndjekur trajtim të vazhdueshëm që nga momenti i hyrjes në institucionin e vuajtjes së dënimit.
Autoritetet kanë nisur menjëherë hetimet për të zbardhur rrethanat e ngjarjes. Drejtoria e Përgjithshme e Burgjeve ka shprehur ngushëllimet familjarëve të të ndjerit.
