Një 16-vjeçare me origjinë shqiptare është gjetur e pajetë mëngjesin e djeshme jashtë një kishe në kodrën e Profitis Ilias në Trikala në Greqi. Ekspertë të mjekësisë ligjore kanë shkuar në vendngjarje për të ekzaminuar trupin e pajetë, në të cilin janë vënë re shenja dhunë në trup e fytyrë, të cilat dukeshin sikur ishin shkaktuar nga një këpucë.
Sipas mediave greke e mitura i ishte drejtuar Policisë, ku kishte denoncuar dhunën nga një shok i saj. E mitura ishte shpallur e zhdukur nga familja e saj që prej ditës së djeshme, ndërsa e motra kishte telefonuar Policinë. Autoritetet kanë nisur hetimet lidhur me ngjarjen duke marrë në pyetje të gjithë të personat që e njihnin të miturën.
Sot mediat fqinje kanë zbardhur dëshminë e motrës së 16-vjeçares shqiptare, e cila ka dhënë detaje, lidhur me ngjarjen tragjike. Ajo ka bërë me dije se e mitura herën e fundit që kishte dalë nga shtëpia, kishte thënë se do të takohej me një djalë, me të cilin ishte njohur kohët e fundit.
Sipas dëshmisë së motrës së 16-vjeçares, bëhet fjalë për një efektiv policie, që është një djalë i moshës 26-vjeçare.
“Dolën për herë të parë dje. Ai ishte më i madh se ajo. Doli në orën 03:00 nga shtëpia dhe nuk erdhi më. U shqetësova, telefonova policinë dhe u thashë që ta kërkonin,”-tregon e motra.
Babai i adoleshentes ka shkuar dhe është ulur në gjunjë në vendin ku u gjet trupi i të bijës.
