Qyteti i Vlorës është tronditur sërish nga të shtënat me armë zjarri mbrëmjen e djeshme. Ngjarja e rëndë ka ndodhur në fshatin Resulaj të Selenicës së Vlorës.
47-vjeçari Laver Tozaj u ekzekutua me 3 plumba. Viktima ka qenë duke pirë kafe në një lokal.
Dikush e ka vëzhguar kur është ngritur nga kafja dhe kur ndodhej në rrugicën pranë shtëpisë, e kanë qëlluar me pistoletë silenciator. Kjo shpjegon edhe pse asnjë banor i fshatit nuk ka dëgjuar zhurmë.
Një plumb e ka kapur viktimën në kokë, ku goditja ka rezultuar fatale.
Ai u vu re nga kalimtarët pranë shkollës 9-vjeçare në Selenicë. Kalimtarët e transportuan me shpejtësi 47-vjeçarin për në Spitalin Rajonal të Vlorës, por mjekët deklaruan vdekjen e tij sapo mbërriti.
Viktima njihej edhe me emrin Nikola Ikonomi. Ai akuzohet se ka qenë i përfshirë në trafik lëndësh narkotike. Viktima ka qenë i pandehur te Krimet e Rënda në vitin 2005, ku u dënua me 6 vjet e 4 muaj burg.
Ngjarja është ende e paqartë. Policia është duke punuar për të bërë të mundur edhe kapjen e autorit të ngjarjes së rëndë.
Gjithashtu policia do marrë në pyetje edhe familjarët e viktimës, për të mësuar më shumë detaje rreth ngjarjes. Mësohet se viktima është babai i një djali 19 vjeç.
