Është publikuar fotoja e 29-vjeçarit Ermir Dedja, i cili u ekzekutua në një atentat mafioz në orët e para të mëngjesit të sotëm në Durrës.
Sipas të dhënave paraprake të policisë, pista kryesore e hetimeve lidhet me përplasjet mes grupeve kriminale.
Autorët, ende të paidentifikuar, i kanë zënë pritë dhe e kanë qëlluar me breshëri kallashnikovi. Fillimisht Dedja mbeti i plagosur rëndë dhe është transportuar në spital nga banorët e zonës, por nuk mundi t’u mbijetojë plagëve.
Plumbat kanë goditur edhe ambientet e një qendre shëndetësore që ndodhet pranë vendngjarjes, duke rritur frikën te banorët.
Policia ka sekuestruar kamerat e sigurisë në zonë dhe po punon për identifikimin e autorëve.
Dedja, me origjinë nga Shijaku, dyshohet se një ditë para atentatit ka pasur një konflikt me disa persona.
Gjithashtu, burime bëjnë me dije se ai ishte vënë nën mbikëqyrje gjatë gjithë ditës së djeshme, çka ngre dyshime për një atentat të mirëorganizuar.
Emri i tij lidhet me Aldo Avdylajn, nipi i Astrit dhe Altin Avdylajt, figura të njohura të një grupi kriminal me bazë në Shijak.
Aldo Avdylaj ndodhet aktualisht në kërkim, i akuzuar për pjesëmarrje në organizatë kriminale dhe përfshirje në plane për vrasje.
