Gjykata e Posaçme kundër Korrupsionit dhe Krimit të Organizuar ka konfirmuar masën e sigurisë “arrest në burg” për Denis Bajrin, i ekstraduar nga Dubai më 23 korrik.
Vendimi vjen pas kërkesës së SPAK, që e akuzon Bajrin për një sërë veprash të rënda penale, përfshirë vrasje me paramendim të kryer në bashkëpunim, pjesëmarrje në grup të strukturuar kriminal dhe armëmbajtje pa leje.
Bajri ishte arrestuar më 27 shkurt 2024 në Emiratet e Bashkuara Arabe, si pjesë e operacionit të gjerë “Metamorfoza”, një nga hetimet më të rëndësishme të viteve të fundit ndaj botës së krimit të organizuar në Shqipëri.
Ai rezulton të jetë i përfshirë në atentatin ndaj Gjin Boriçit, ngjarje e ndodhur më 9 gusht 2020 në Vau i Dejës. Sipas dosjes së SPAK, vrasja është kryer me urdhër të Ervis Martinajt, i cili e shihte viktimën si konkurrent në tregun e lojërave të fatit.
Hetimet e SPAK kanë zbuluar komunikime të koduara përmes aplikacionit “SkyECC”, ku Denis Bajri raporton pas ekzekutimit me mesazhin “kryvi” drejtuar Behar Bajrit dhe më pas edhe Ervis Martinajt. Ky mesazh, i dërguar në të njëjtën kohë me orën e vrasjes, konsiderohet provë e drejtpërdrejtë për përfshirjen e tij në krim.
Sipas hetimeve, atentati ndaj Gjin Boriçit ishte pjesë e një zinxhiri porosish kriminale: Pëllumb Gjoka, një emër i njohur në botën e biznesit dhe të krimit, thuhet se kishte pajtuar Behar Bajrin për eliminimin e Boriçit, ndërsa ky i fundit ia kishte deleguar detyrën Denisit. Në këmbim, Gjoka kërkoi më vonë ekzekutimin e Kleanth Musabelliut, një ish-punonjës i burgut, i cili i shpëtoi atentatit.
Në total, ndaj Denis Bajrit rëndojnë pesë akuza të rënda, të cilat lidhen me aktivitetin kriminal të grupit “Bajri” me bazë në Shkodër. Prokuroria e Posaçme deklaron se hetimet ndaj këtij grupi vijojnë dhe priten zhvillime të tjera.
