Pamje tronditëse janë publikuar nga ambientet e një spitali në Tiranë, ku Laert Kasaj, pronari i restorantit “Tokyo”, shfaqet me shenja të dukshme dhune në fytyrë, përfshirë një sy të nxirë dhe hematoma, pas një sulmi të dhunshëm të ndodhur mbrëmjen e së hënës në kompleksin “Delijorgji”.
Sipas burimeve nga policia, autorët e dyshuar janë Ferhat Kaja dhe një i afërm i tij, të cilët janë shpallur në kërkim. Dyshohet se të dy janë të lidhur me lokalin “Stockholm”, i cili ndodhet përballë vendit ku ndodhi ngjarja.
Sipas dëshmitarëve, konflikti nisi pas një përplasjeje verbale që degjeneroi shpejt në dhunë fizike të ashpër. Një nga autorët dyshohet t’i ketë thënë Kasajt: “Pse më ke denoncuar?”, duke ngritur dyshime se sulmi mund të jetë i lidhur me një denoncim të mëparshëm për zaptim të hapësirës publike nga lokali “Stockholm”.
Policia po vijon hetimet për zbardhjen e plotë të rrethanave dhe kapjen e autorëve, ndërsa Kasaj ndodhet nën trajtim mjekësor dhe pritet të dëshmojë sapo të përmirësohet gjendja e tij shëndetësore.
