Gjykata e Krimeve të Rënda vendosi të dënojë me 5 vjet burg ish-ministrin e Brendshëm, Saimir Tahiri.
Organi i drejtësisë rrëzoi akuzat për trafik droge dhe përfshirje në grup të strukturuar kriminal, duke lënë në fuqi vetëm akuzën për shpërdorim detyre.
Duke qenë se procesi ndaj Tahirit u zhvillua me gjykim të shkurtuar, dënimi zbret në 3.4 vjet dhe do të konvertohet në 3 vjet shërbim prove.
Gjatë periudhës 5-vjeçare Tahiri nuk do të mund të ushtrojë asnjë funksion publik.
Fillimisht prokuroria kërkoi 12 vjet burg për ish-ministrin, që do të zbrisnin më pas në 8 për shkak të gjykimit të shkurtuar, mirëpo organi i akuzës, nuk gjeti prova të mjaftueshme, për të fajësuar Tahirin për trafik droge.
Menjëherë pas vendimit, ish-ministri e ka lexuar vendimin e gjykatës, sikur këta të fundit nuk kanë këllqe që ta thonë se është i pafajshëm.
Dënimin Tahiri e ka quajtur majën e betejës, ndërsa ka deklaruar se do ta apelojë vendimin e gjykatës.
Ndër të tjera ai shtoi, se nuk mund të mbajë përgjegjësi për çdo kushuri që i përdor emrin.
“Më rezervoni të drejtën ta përtyp një herë këtë estradë që ndodhi. mesa kuptova, gjykata më tha që nuk jam kriminel nuk jam trafikant nuk jam pjesë e një grupi kriminal por me gjithë ca kushërinj të mi kanë përdorur emrin tim unë kam shpërdoruar detyrën. As qesh dot as qaj dot por nesër po ju ftoj të ndajmë bashkë ca mendime. Ku di unë mu duk një gjë e tipit, je i pafajshëm po s’kemi këllqe të ta themi. prisni deri nesër, unë nesër do të komunikoj me mediat. Unë dy vjet jam hetuar si trafikanti më i madh i Shqipërisë, ca t’ju them, jam hetuar si pjesë e një grupi kriminal që kam bërë trafik droge, sot gjykata më thotë nuk ke bërë trafik droge, nuk ke ndihmuar në trafik droge, por meqë kushërinjtë paskam përdorur emrin tim unë kam shpërdoruar detyrën. Ca t’ju them zoti ju ruajt edhe juve masë nuk ju përdor njeri emrin. Kjo është vetëm maja e betejës sime. Prisni deri nesër edhe mua më duhet kohë ta kuptoj këtë që ndodhi”, deklaroi Tahiri.
