Ditën e sotme një tjetër anëtar i grupit të njohur si “Bajrat e Shkodrës”, Klaudio Hoxhalliu, është lënë i lirë.
Ai u arrestua në mars të vitit 2019, por fal mungesës së provave kundër tij nuk u hetua e gjykua nga Krimet e Rënda, por nga Gjykata e Tiranës.
Në fund të vitit 2019, Gjykata e Tiranës mori vendimin duke e dënuar atë me 1 vit e 7 muaj burg, por Hoxhalliu po gjykohej me masën e sigurisë “arrest në shtëpi” dhe 19 ditë pas vendimit për dënimin e tij, është liruar nga akuzat.
Sipas vendimit të gjyqtares Rexhina Merkila, Hoxhalliu ka shlyer dënimin e dhënë më herët me masën e sigurisë “arrest në burg” dhe “arrest në shtëpi”.
I ashtuquajturi ‘grupi Bajri’ u akuzua për vrasje dhe gjobëvënie nga policia dhe Prokuroria e Krimeve të Rënda, por në SPAK u argumentua se nuk ka prova që të akuzuarit kanë bashkëpunuar në kuadër të “grupit të strukturuar kriminal”.
Akuzat ndaj tyre janë nga prodhimi e shitja e lëndëve narkotike tek shtrëngimi me anë të kanosjes ose dhunës për dhënien e pasurisë.
‘Bajrat e Shkodrës’ u goditën vitin e shkuar nëpërmjet operacionit të koduar “Oaz”, ku u arrestuan 11 pjesëtarë të këtij grupi dhe konsiderohet si një nga operacionet më të sukseshme të policisë shqiptare.
