VLORË–Ahmet Isufaj është lënë i lirë nga Gjykata e Apelit të Vlorës.
Ai u arrestua në fillim të këtij muaji dhe kërkohej nga drejtësia kosovare nën akuzën e krimit të organizuar dhe trafikut të lëndëve narkotike.
Fillimisht ai u la në “arrest me burg” me afat 40 ditor, si kohë për të pritur materialet hetimore nga prokuroria e Kosovës.
Mirëpo, shkak i vendimit të fundit të Apelit është bërë gjendja shëndetësore e Isufajt, që sipas disa raporteve mjekësore ishte jo e mirë.
Bëhet me dije se 65-vjeçari ka qënë i shtruar në qeli që nga dita e parë e burgut.
Me argumentin se qëndrimi gjatë në burg mund t’i rrezikojë jetën, tre gjyqtarët Petrit Aliaj, Klodiana Gjyzari dhe Hysen Saliko kanë vendosur që t’i caktojmë masën “arrest shtëpie”.
Ahmet Isufaj është xhaxhai i Arben Isufajt, që në Fier njihet dhe si “Ben Qimja”.
‘Ben Qimja’ ka një të kaluar kriminale në shtetin italian dhe është dënuar nga Gjykata e Torinos për trafik ndërkombëtar lëndësh narkotike.
Ai u arrestua nga autoritet shqiptar më 2014, ndërkohë që Italia kërkoi ekstradimin e tij.
Mirëpo edhe ‘Ben Qimja’ u la i lirë, si Ahmet Isufaj, me justifikimin se dokumentat për ekstradimin e tij nuk kishin mbërritur në kohë.
