Mjeku Edvin Prifti është liruar nga burgu. Vendimin eka dhënë Apeli i Gjykatës së Posaçme. Avokatët kishin kërkuar që masa e sigurisë për mjekun të ndryshonte, pasi i ka mohuar akuzat. Për mjekun ka mbetur në fuqi masa e pezullimit nga ushtrimi i detyrës.
Mjeku kardiolog Edvin Prifti u përmend në përgjimet që zbuluan skandalin e Gjykatës së Krujës për korrupsion. Nga kontrollet në zyrën e tij u gjetën 160 milionë lekë dhe në banesë iu gjetën 200 mijë euro. Prokuroria e Posaçme Kundër Korrupsionit dhe Krimit të Organizuar kërkoi arrestimin e mjekut pasi në përgjimet e dosjes së Krujës përmendej emri i tij, pasi kërkonte 2 mijë euro për të futur dikë në operacion jashtë radhe. Në 13 shkurt ai u la në burg me akuzën për pastrim parash.
Ndërkohë, masa e sigurisë nuk ka ndryshuar për gjyqtaren Enkelejda Hoxha e cila do të vazhdojë të mbetet në burg edhe pse avokati i saj kërkoi ndryshimin e masës së sigurisë pasi Hoxha është nënë e dy fëmijëve të cilët kanë nevojë për përkujdesjen e saj. Gjyqtarja Enkelejda Hoxha u arrestua pasi kishte prova se ajo merrte shumë të majme që shkonin nga 6 mijë deri në 12 mijë euro për të liruar nga burgu figura të njohura të krimit, në bashkëpunim me avokatin Aldo Tabaku.
