Kreu i Partisë Social-Demokrate të Kosovës, Dardan Molliqaj ka reaguar për herë të parë pasi u arrestua me dhunë nga policia e Kosovës ditën e sotme. Ai u la i lirë disa orë pas arerstimit, me disa akuza të ngritura ndaj tij, ndërsa ka reaguar pas ngjarjes. Molliqaj shkruan në një postim në Facebook se është detyrë mbrojtja e UÇK-së, në një kohë kur ndaj saj po bëhet luftë speciale.
Ai shprehet se dhuna ndaj aktivistëve të PSD-së është dhunë e mosdurimit të pushtetit, sa herë shpaloset pozicioni i tij i gabuar.
Postimi i plotë:
MBROJTJA E UÇK-SË ËSHTË DETYRË E KOHËS
Sot kur ndaj UÇK-së po bëhet luftë speciale, jashtë e brenda vendit, mbrojtja e saj është detyrë e kohës. Është mbrojtje e shtetit të Kosovës. Sepse nuk qëndron dot, e fortë dhe e sigurt, një ndërtesë që ia gërryejnë themelin.
Kur nuk e mbron UÇK-në, tashmë je rreshtuar. Ke marrë pozicion, kundër UÇK-së. Prandaj i arreston ata që e mbrojnë. Prandaj i mbron, i ngritë lartë, e u jep pozita atyre që e luftojnë.
Ndërkaq dhuna ndaj nesh, nuk është thjeshtë dhunë ndaj nesh. Është dhunë e mosdurimit të pushtetit sa herë që i shpaloset pozicioni i tij i gabuar.
Po ky pushtet, me këtë mënyrë të të menduarit, u ka dhënë zemër fraksioneve brenda policisë që janë kundër UÇK-së. U ka dhënë zemër të sillen dhunshëm ndaj kujtdo që është kundër qeverisë. Prandaj dhuna e shfrenuar.
Sot mbrojtja e UÇK-së është detyrë e kohës. Është detyrë e secilit. Është detyrë që do të kryhet, pavarësisht çfarë dhune nxjerrë pushteti përballë.
