Melisa Hoxhallari, 29 vjeç, është arrestuar nga Policia e Fierit pasi ishte shpallur në kërkim për bashkëpunim në plagosjen e ish-bashkëshortit të saj, Gledian Hoxhallari.
Ndërkohë, autori i dyshuar i plagosjes, Klement Beqaj, mbetet ende në arrati.
Ngjarja ndodhi më 5 janar, në një lokal pranë “Zogut të Zi” në Fier, ku pas një debati për kujdestarinë e djalit të mitur, Beqaj i dashuri i Melisës qëlloi me armë zjarri mbi 40-vjeçarin Gledian Hoxhallari.
Në momentin e ngjarjes, në tavolinë ndodhej edhe djali i çiftit, 9 vjeç, i cili përjetoi të gjithë skenën e dhunshme.
Pavarësisht lutjeve të fëmijës që të mos largohej, Melisa u largua nga vendngjarja së bashku me Beqajn, duke lënë të birin pranë të atit të gjakosur.
Hoxhallari u transportua me urgjencë në Spitalin e Traumës në Tiranë, ku iu nënshtrua trajtimit intensiv. Ndërkohë, policia identifikoi menjëherë autorin dhe nisi ndjekjen për kapjen e tij, por deri më sot ai nuk është vënë në pranga.
Sipas të dhënave zyrtare, Melisa Hoxhallari akuzohet për “Plagosje të rëndë me dashje” dhe “Mbajtje pa leje e armëve dhe municionit”.
Ajo u ndalua në zbatim të vendimit të Gjykatës së Fierit, e cila kishte caktuar për të masën e sigurisë “Arrest në burg”.
Për Klement Beqajn, 25 vjeç, është lëshuar urdhër arresti për veprat penale “Vrasja me dashje” e mbetur në tentativë dhe “Prodhimi e mbajtja pa leje e armëve luftarake”.
Nga hetimet e deritanishme rezulton se çifti Hoxhallari ishin në proces divorci prej tre muajsh dhe gjykata kishte vendosur një skemë të përkohshme kujdestarie për djalin, ku ai qëndronte gjatë ditës me të atin dhe në mbrëmje me të ëmën.
Pikërisht në përpjekje për të dorëzuar fëmijën në orët e mbrëmjes, u organizua takimi në lokal, që përfundoi me plagosje.
Melisa Hoxhallari rezulton se kishte denoncuar më parë ish-bashkëshortin për dhunë në familje dhe kishte një urdhër mbrojtjeje në fuqi.
Pavarësisht kësaj, gjykata lejoi kontaktet për shkëmbimin e fëmijës, çka përfundoi me një ngjarje të rëndë përballë syve të9-vjeçarit.
Djali aktualisht ndodhet në kujdesin e gjyshërve nga ana e babait. Hetimet vazhdojnë për të zbardhur rolin e plotë të Melisës në ngjarje si dhe për të kapur autorin e armatosur që vijon të fshihet.
