Një anije shqiptare është sulmuar me predha në Portin e Tripolit, në Libi, duke shpërthyer më pas në flakë.
Anija i ishte dhënë me qera ushtrisë turke për të kryer transportin e armëve dhe mësohet se ka qenë e mbushur me armatime, ndërsa sulmi është kryer nga forcat e ushtrisë së Khalifa Haftar.
Anija u nis nga porti i Mersinit në Turqi për në Libi, në vendin ku edhe do të dorëzonte armët.
Ushtria e Haftar kishte paralajmëruar më herët se çdo mjet lundrues apo fluturues i mbushur me armë do të goditej, ndërsa bëhet me dije se ekuipazhi shqiptar ishte zëvendësuar me atë turk por ende nuk dihet nëse ka persona të lënduar.
Kujtojmë se Khalifa Haftar është drejtuesi i forcave të paligjshme të armatosura në lindje të Libisë, i cili është në luftë me qeverinë e Tripolit.
Kjo e fundit është mbështetur nga Turqia dhe Katari kurse Haftar ka mbështetjen e vendeve të tjera si Egjipti, Arabia Saudite përfshirë edhe Italinë dhe SHBA-në.
