Mateo Spaho, Dekan i Fakultetit të Ekonomisë në Univeristetin Luarasi ka bërë thirrje që për turizmin vendas të bëhet çdo gjë duke marrë masat mbrojtëse, pasi këtë vit jemi në rrezik.
“Këtë vit rrezikojmë të marrim gjysmën, afër 1 miliardë euro për ekonominë shqiptare. I bëj thirrje dhe një apel që charterat të jenë 100 në ditë, jo 1 në ditë. Duhet të marrim masa në mbrojtje të turizmit. Për turizmin vendas të bëjmë çdo gjë mundshme për ta favorizuar në masë.”
Kërkesa e Spahos vjen në një kohë kur mundësitë e shtetit shqiptar janë për një investim të tillë që do ishte shumë i dobishëm për ekonominë dhe GDP-n e vendit. Turizmi në vendin tonë mbulon 1/5 e ekonomisë dhe ka një peshë prej 22% në GDP.
Investimet e qeverisë por edhe Ministrisë së Turizmit duhet të rriten më tepër nëse duam që të shpëtojmë këtë sektor kaq të rëndësishëm.
Më tej Spaho i bën thirrje qeverisë dhe Ministrisë së Turizmit të motivojë qytetarët të bëjnë pushime brenda Shqipërisë kundrejt një page simbolike ashtu siç edhe Maqedonia planifikon të bëjë. Shqipëria mund ta bëjë këtë pasi ka marrë borxhe por edhe taksat më të larta.
Kjo do të ishte një mënyrë shumë e mirë e investimit në turzimin vendas dhe zhvillimin e mëtejshëm të tij.
Ndonëse turizmi shihet si motori i ekonomisë së vendit tonë, duket se ai ka ende shumë probleme dhe goditja që ka marrë nga pandemia ka qenë vendimtare.
Nga veriu në jug, ky sektor tashmë ka si synim vetëm mbijetesën, teksa politikat e qeverisë duket se po ia vështirësojnë edhe më shumë këtë gjë.
Fakt mbetet që turizmi këtë vit do të punojë me kapacitet të reduktuar, çmimet mund të ulen por përsëri familjet nuk do të kenë mundësi të pushojnë.
Askush këtë vit nuk mendon që të sigurojë fitime nga turizmi por thjesht të mbijetojë dhe të ketë sa më pak humbje.
Skenarët e mundshëm për turizëm këtë vit janë: Turizmi i brendshëm, turizmi rajonal dhe ai pa kufizime.
