Një tjetër ngjarje e rëndë ka tronditur sot zonën turistike të Gjipesë në bregdetin e Vlorës.
Rreth orës 13:40, një turist gjerman 46-vjeçar është plagosur rëndë pasi është goditur nga helika e një gomoneje, teksa po bënte zhytje pranë vijës bregdetare.
Sipas burimeve zyrtare, gomonia drejtohej nga 27-vjeçari Krenar Velaj, banues në Orikum, i cili ndodhej jashtë perimetrit të sigurisë, edhe pse në posedim të dokumentacionit të rregullt për mjetin lundrues.
Turisti ndodhej në ujë, shumë pranë gomones, kur ndodhi incidenti. Ai ka marrë plagë të rënda në gjymtyrët e poshtme dhe në krah, për shkak të goditjes nga helikat.
Ka qenë vetë drejtuesi i gomones që ka reaguar i pari, duke e nxjerrë të dëmtuarin në breg dhe më pas e ka transportuar me mjetin lundrues drejt Himarës për të kërkuar ndihmë mjekësore.
Policia Kufitare në Dhërmi ndërhyri menjëherë, duke dhënë ndihmën e parë dhe duke organizuar transportin e turistit drejt qendrës shëndetësore të Himarës.
Për shkak të gjendjes së rëndë, u kërkua ndërhyrja me helikopter, dhe mjeti ajror i Forcave të Armatosura mbërriti në Himarë për të dërguar të plagosurin drejt Spitalit të Traumës në Tiranë.
Burimet nga spitali bëjnë me dije se gjendja e turistit është kritike.Ndërkohë, drejtuesi i gomones është shoqëruar në komisariatin e Dhërmiut për t’u marrë në pyetje.
Po ashtu janë shoqëruar edhe disa dëshmitarë që ndodheshin në zonë në momentin e ngjarjes. Hetimet për rastin po udhëhiqen nga Prokuroria, ndërsa policia njoftoi se janë duke u analizuar të gjitha rrethanat për të përcaktuar përgjegjësitë ligjore.
Ky aksident rikthen në vëmendje shqetësimin e madh për mungesën e kontrollit dhe sigurisë në zonat bregdetare, sidomos në kulmin e sezonit turistik.
Rasti më i rëndë i viteve të fundit mbetet ai i verës së vitit 2022, kur 7-vjeçarja Jonada Avdia u përplas për vdekje nga një skaf i drejtuar nga një oficer i Policisë së Shtetit, Arjan Tase, po në bregdetin e Himarës.
Megjithë tragjeditë që përsëriten, autoritetet duket se nuk kanë ndërmarrë masa efektive për të parandaluar incidentet me mjete motorike pranë pushuesve.
Mungesa e patrullimit, e sinjalistikës dhe ndëshkimeve serioze ndaj shkelësve, po i kthen bregdetet shqiptare në një terren të rrezikshëm për jetën e pushuesve, vendas dhe të huaj.
