Protoksidi i azotit, që po përdoret masivisht nga të rinjtë dhe adoleshentët përmes tullumbaceve. Në fakt vështirësia e kontrollit nga ana e autoriteteve lidhet me faktin se deri më tani protoksidi i azotit nuk klasifikohet tek barnat narkotike të ndaluara.
Ky diskutim u soll në Komisionin e Ligjeve si shqetësim përpara zv/ministres së shëndetësisë Entela Ramosaçaj, e cila deklaroi se ky medikament përdoret në spitale si anestezik, por dha garancinë se lënda nuk rrjedh nga spitalet. Deputetja e Partisë Demokratike, Dhurata Çupi kërkoi që Ministria e Shëndetësisë të ndërmarrë masa konkrete për parandalimin e këtij fenomeni.
Sipas saj, projektligji i vënë në tryezën e kuvendit ka për qëllim vetëm ndryshimet për kanabisin mjekësor, por jo reflektimin e kësaj problematike. Veç spitaleve, kjo lëndë e rrezikshme për shëndetin e adoleshentëve përdoret edhe në industrinë e ushqimit dhe asaj të makinave, duke hapur dy pista të reja kontrolli se lënda mund të rrjedhë në mënyrë të paligjshme edhe prej këtyre dy sektorëve.
Komisioni i ligjeve miratoi këtë të martë ndryshimet në ligjin “Për barnat narkotike dhe lëndët psikotrope” për të përditësuar tabelën e medikamenteve, çka do të thotë se kanabisi mjekësor do të njihet si i tillë.
