Presidenti amerikan Donald Trump ka kritikuar numrin e festave zyrtare në SHBA, duke i cilësuar ato si një barrë për ekonominë.
Në një reagim të publikuar në platformën e tij Truth Social, më 19 qershor, “Juneteenth”, festa federale që shënon fundin e skllavërisë në SHBA, Trump shkroi: “Amerika ka shumë festa. Po humbim miliarda sepse bizneset mbyllen. Punonjësit nuk i duan këto ditë pushimi. Nëse duam të bëjmë Amerikën përsëri të madhe, duhet të ketë ndryshime”.
Por ekspertët nuk janë të një mendjeje. Sipas analizës së CNN, ndikimi ekonomik i pushimeve nuk është domosdoshmërisht negativ.
Në fakt, disa sektorë si turizmi, tregtia me pakicë dhe shërbimet shënojnë rritje të ndjeshme gjatë festave, si pasojë e konsumit të shtuar dhe aktiviteteve promocionale.
Edhe bizneset e vogla përfitojnë. Një studim britanik zbuloi se festat zyrtare sjellin mesatarisht rreth 340 dollarë fitim shtesë për çdo dyqan të vogël.
Megjithëse disa sektorë mund të preken nga ndërprerja e punës, ekspertët theksojnë se pushimet kontribuojnë pozitivisht në mirëqenien e punonjësve dhe, në afat të gjatë, mund të nxisin një rritje më të qëndrueshme ekonomike.
