Presidenti amerikan, Donald Trump, njoftoi se të martën do të zhvillojë një tjetër bisedë me presidentin rus, Vladimir Putin, për të diskutuar një mundësi konkrete për t’i dhënë fund luftës në Ukrainë. Sipas tij, bisedimet vijnë pas përgatitjeve intensive gjatë fundjavës, ndërkohë që situata ushtarake vazhdon të përshkallëzohet.
Trump deklaroi për gazetarët gjatë një fluturimi me Air Force One drejt Uashingtonit nga Florida se negociatorët tashmë kanë avancuar në diskutimet mes palëve. “Do të flas me presidentin Putin të martën. Është bërë shumë punë gjatë fundjavës. Ne duam të shohim nëse mund ta çojmë deri në fund atë luftë. Ndoshta ne mundemi, ndoshta nuk mundemi, por mendoj se kemi një shans shumë të mirë,” u shpreh ai.
Trump po kërkon mbështetjen e Rusisë për një armëpushim 30-ditor, i cili tashmë është pranuar nga Ukraina javën e kaluar. Ky zhvillim vjen në sfondin e intensifikimit të sulmeve ajrore nga të dyja palët gjatë fundjavës, ku Rusia është afruar gjithnjë e më tepër drejt marrjes së kontrollit mbi bazën kryesore të forcave ukrainase në rajonin perëndimor rus të Kurskut.
I pyetur për temat që do të trajtohen, Trump tha se në qendër të bisedimeve do të jenë territoret dhe asetet strategjike. “Do të flasim për tokën. Ne do të flasim për termocentrale. Unë mendoj se kemi shumë prej tyre të diskutuara tashmë shumë nga të dyja palët, Ukraina dhe Rusia. Ne tashmë po flasim për këtë, duke ndarë asete të caktuara,” theksoi Trump.
