Presidenti amerikan Donald Trump ka ndërmarrë të shtunën hapa të mëtejshëm për të shtyrë pagimin e taksave për miliona amerikanë, e për të zgjatur në kohë programin tashmë të përfitimeve të papunësisë pasi dështuan negociatat me Kongresin.
Në Nju Xherski, Trump ka nënshkruar një urdhër ekzekutiv, dhe tre memorandume që synojnë të ndihmojnë miliona amerikanë të cilët kanë humbur punën për shkak të pandemisë të Covid-19.
Urdhri i ri ekzekutiv parashikon pagesa deri 400 dollarë në javë, ndërsa më herët ishte 600.
Kongresi lejoi që programi i pagesave prej 600 dollarësh në javë të skadonte më 1 gusht dhe negociatat për zgjatjen e këtij afati kanë përfunduar në polemika partiake mes Shtëpisë së Bardhë dhe demokratëve.
Gati dy javë bisedime midis zyrtarëve të Shtëpisë së Bardhë dhe demokratëve të Kongresit përfunduan të premten pa marrëveshje.
Palët janë ende larg njëra-tjetrës lidhur me hapat e ardhshëm për të trajtuar pandeminë që ka marrë shumë jetë njerëzish dhe i ka kushtuar rëndë ekonomisë amerikane. SHBA është vendi më i goditur nga koronavirusi në glob.
