Policia ka shpallur në kërkim 36-vjeçarin Klodian Steli, banues në Fushë-Krujë, i dyshuar si autor i vendosjes së një sasie lënde plasëse në portën e garazhit të Elvis Kosovës, i njohur ndryshe si “Visi i Garave”. Ngjarja ndodhi më 24 korrik 2025, në rrugën “Peti” në Tiranë.
Sipas informacionit zyrtar të policisë, lënda shpërthyese është vendosur në hyrje të garazhit të Kosovës, ndërsa përmes pamjeve të kamerave të sigurisë në zonë, hetuesit kanë mundur të identifikojnë autorin dhe të rindërtojnë itinerarin e tij.
Pas vendosjes së tritolit, Steli është larguar në drejtim të pyllit pranë Liqenit të Thatë, ku ka qëndruar për rreth 30 minuta, me qëllim shmangien e ndjekjes. Më pas, ai ka dalë në një rrugicë tjetër dhe është larguar nga zona, duke përdorur një automjet që rezultoi të ishte marrë me qira në Fushë-Krujë.
Gjurmimi i mëtejshëm përmes kamerave të sigurisë ka ndihmuar policinë të identifikojë mjetin dhe më pas autorin.
Verifikimet kanë zbuluar se Klodian Steli është larguar nga territori i Shqipërisë që në ditën e ngjarjes. Grupi hetimor po vijon punën për lokalizimin dhe kapjen e tij.
Njoftimi:
Tiranë
Zbardhet autorësia e vendosjes së lëndës plasëse në garazhdin e shtetasit E. K., ndodhur më datë 24.07.2025. Identifikohet dhe shpallet në kërkim autori i dyshuar. Gjendet dhe automjeti me të cilin ky shtetas lëvizi gjatë kryerjes së krimit.
Si rezultat i hetimeve të thelluara, të kryera nga shërbimet e Komisariatit të Policisë Nr. 1, me qëllim zbardhjen dhe dokumentimin e plotë të ngjarjes së ndodhur më datë 24.07.2025, në rrugën “Peti”, ku në portën hyrëse të garazhit të shtetasit E. K. u vendos një sasi lënde plasëse, kanë identifikuar dhe shpallur në kërkim autorin e dyshuar të ngjarjes, shtetasin:
K. S., 36 vjeç, banues në Fushë Krujë. Punohet intensivisht për lokalizimin dhe ndalimin e tij. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
