Shkodër– Mbrëmjen e djeshme ka ndodhur një shpërthim me tritol në banesën e Prelë Milani, shef i Stacionit të Policisë Theth.
Fatmirësisht, nga shpërthimi nuk ka të lënduar, por vetëm dëme materiale.
Brenda në shtëpi ndodheshin bashkëshortja dhe vajza e Milanit, i cili vet sapo kishte dalë për të shkuar në punë.
Sasia e tritolit është vendosur në pjesën e pasme të banesës, në një dhomë që përdorej vetëm si magazinë e nuk jetonte njeri.
Familjarët kanë njoftuar menjëherë Milanin, i cili ndonëse e kishte dëgjuar shpërthimin nuk e kishte kuptuar se kishte ardhur nga banesa e tij.
Tashmë ekspertët po hetojnë rreth ngjarjes.
Vetë shefi mendon se kjo ngjarje ka ardhur për shkak të detyrës së tij.
Dyshimet e para janë se ky është një sinjal për efektivin , i cili është përfshirë shpesh në operacione për asgjësim të lëndëve narkotike.
Milani bën me dije se nuk ka marrë kërcënime, por këmbëngul se kjo është sinjal për detyrën e tij.
Policia po punon për zbardhjen e ngjarjes dhe nuk ka ende të dyshuar.
