Kandidati për deputet i Partisë Demokratike, për Qarkun e Gjirokastrës, Prof.Dr.Tritan Shehu, ka depozituar një kallëzim penal për shtatë kryetar të bashkive të Qarkut. Sipas kandidatit demokrat, këta të fundit kanë shkelur disa herë ligjin për mos vënien në dispozicion të hapsirave publike, subjekteve politike për reklamimin e posterave elektoral brenda afatit që përcakton ligji. Ndër të tjera edhe disa shkelje që bien ndeshë me nenet e Kodit Zgjedhor. “Veç kësaj edhe disa shkelje të tjera që bien ndesh me nenet e Kodit Zgjedhor të Republikës së Shqipërisë”, deklaron Shehu.
Mësohet se Shehu ka dorëzuar një dosje voluminoze dhe pjesë e kësaj dosje kanë qenë edhe drejtues të institucioneve të ndryshme publike, të cilët sipas Shehut ushtrojnë presion ndaj punonjësve të administratës me qëllim diktimin e votës dhe orientimin e saj në favor të partisë në pushtet.
“Pjesëmarrja hapur e këtyre drejtuesve institucionesh në orarin e punës, është një tjetër shkelje që u rëndon atyre dhe për të cilën do të mbajnë përgjegjësi penale.
Fakte dhe prova konkrete janë dorëzuar sot duke i kapur në flagrancë në shkelje drejtuesit që akuzohen”, thekson ai. Shehu nuk bëri publike emrat e drejtuesve të institucioneve, por garantoi se ato do të bëhen publike fill pasi të depozitohen në organin e akuzës.
