Ditën e sotme janë raportuar 12 raste të reja me Covid-19 në Kosovë nga 4 që u shënuan dje, duke e çuar në 1.064 numrin total të të prekurve.
Rastet pozitive janë raste kontakti: 6 raste nga komuna e Vushtrrisë , 5 raste nga komuna e Prizrenit, dhe 1 rast në Malishevë.
Sakaq, ditën e sotme janë shëruar 9 pacientë teksa numri i përgjithshëm i të shëruarve deri më sot është 829.
Ndërkohë nga fillimi i pandemisë e deri tani kanë humbur jetën 30 persona.
Njoftimi i plotë nga Instituti Kombëtar i Shëndetësisë Publike të Kosovës:
NËNTË TË SHËRUAR DHE DYMBËDHJETË RASTE ME COVID-19!
Sot më 29 maj 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 311 mostra të marra nga Klinika Infektive dhe gjurmimi i kontakteve të rasteve në terren.
Me SARS-CoV-2, janë konfirmuar 12 raste.
Rastet pozitive janë raste kontakti nga: komuna e Vushtrrisë 6 raste (sipas vendbanimit: 6 raste Stanovc) dhe komuna e Prizrenit 5 raste (sipas vendbanimit: 5 raste Gërnçar) dhe 1 rast me vendbanim në Mirushë, Malishevë.
Sot më 29 maj 2020, janë shëruar 9 pacientë derisa numri i përgjithshëm i të shëruarve deri më sot është gjithsej 829 raste.
Nga data 08 shkurt deri më 29 maj 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 14.635 persona të dyshimtë në virusin SARS-CoV-2 dhe prej tyre pozitive rezultojnë gjithsej 1.064 raste, me gjithsej 30 raste të vdekjes të cilët kanë pasur sëmundje të tjera shoqëruese.
Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke i obliguar për vetëizolim dhe të kërkojnë ndihmë mjekësore nëse kanë simptome.
Në nivel global, nga data 31 dhjetor 2019 deri më 29 maj 2020 sipas Worldometers, janë raportuar gjithsej 5.950.089 raste të COVID-19 dhe 362.989 raste të vdekjes.
