Situata më e vështirë paraqitet në qytetin e Lezhës ku janë përmbytur 2 lagje, ’11 janari’ dhe ‘Besëlidhja’. Gjithashtu lumi Drin ka dalë nga shtrati në disa zona të saj duke përmbytur sipërfaqe të mëdha me toka bujqësore.
Në Lezhë lagja “Besëlidhja” është përmbytur nga vërshimi i ujit, i cili ka hyrë në blloqet e pallateve. Ndërkohë në lagjen e Spitalit disa familje janë të rrezikuara për shkak të gërryerjes së tokës si pasojë e rrëshqitjes së dheut.
Siç shihet dhe në fotot, tre banesa (vila) ndodhet në “buzë të greminës” pasi dheu është gërryer aq shumë saqë duket sikur nga momenti në moment ato do të rrëzohen.
Fatmirësisht banorët janë evakuuar duke shmangur një tregjedi të mundshme.
Mësohet se shkak i përmbytjeve në Obot të Shkodrës janë shkarkimet me 300 m3/s nga HEC-i i Vaut të Dejës. Forcat e Ushtrisë kanë zbarkuar në Shkodër për të bërë të mundur normalizimin e situatës e për tu ardhur në ndihmë qytetarëve. Gjithashtu ka filluar dhe shkarkimi nga HEC-i i Shkopetit dhe Ulzës. Përmbytje të shumta janë regjistruar dhe në zonën e Fushë-Krujës ku lumi Ishëm ka dalë nga shtrati duke përmbytur disa prej fshatrave përreth. Janë rreth 20 banesa të rrethuara nga uji në lagjen fundore të këtij fshati dhe në disa prej tyre uji ka hyrë brenda. Uji që ndodhet nëpër ara është kryesisht uji i shiut pasi kanalet nuk kanë ku të kullojnë.
Reshjet e dendura të shiut kanë shkaktuar përmbytje në disa qarqe të vendit, e për pasojë është vështirësuar qarkullimi i automjeteve dhe disa rrugë janë bërë gati të pakalueshme.
/Gazetareforma.com/
