Tre lëkundje tërmeti janë ndjerë gjatë natës së kaluar në veri të vendit. Sipas Institutit të Gjeoshkencave, lëkundja e parë ka qenë në orën 04:19 minuta të mëngjesit, me një magnitudë 4 të shkallës Rihter. Epiqendra ka qenë 17 km në verilindje të Koplikut, 28 km në veri të Shkodrës.
Pak minuta më vonë, në orën 04:28 ka pasur një tjetër lëkundje 14 km në verilindje të Koplikut, me magnitudë 2.1.
Dhjetë minuta më pas është ndjerë dhe lëkundja e tretë me magnitudë3.4, 2 km në verilindje të Koplikut. Nuk raportohet për dëme deri më tani.
E ndërkohë kujtojmë këtu se lëkundjet e tërmetit në Shqipëri ende sjellin panik pasi nuk janë harruar akoma pasojat dhe frikën që solli tërmeti i një viti më parë ku humbën jetën disa persona dhe shumë prej tyre mbetën të plagosur. Ato momentet e tmerrit janë ende të ngulitura në memorien e qytetarëve pasi kanë përjetuar gjëra që nuk kishin ndodhur më parë. Ishte një frikë për jetën sepse nga momenti në moment mund të kishte lëkundje të tjera dhe mund të ndodhte ndonjë fatkeqësi. Qeveria ende po punon për ndërtimin e banesave për personat që kanë aplikuar për një shtëpi të re pasi tërmeti nuk iu la asgjë pas përvec rrënojave dhe shkatërrimeve. Shumë shtete i kanë ardhur në ndihmë vendit tonë në mënyrë që të shpejtojnë sa më shumë me ndihmat dhe me ndërtimin banesave.
