Sulmuesi kuqezi, Armando Broja, me shumë gjasa do të huazohet te skuadra e Southampton në Premier League. Këto janë thashethemet e fundit që vijnë nga mediat angleze. Sipas tabloidit “The Sun”, drejtuesit e Southampton kanë arritur akordin paraprak me blutë e Londrës, për transferimin e sulmuesit shqiptar në formë huazimi.
19-vjeçari pritet ta kompletojë huazimin te Southampton gjatë kësaj jave, pas finales së Superkupës së Europës, pasi është grumbulluar nga trajneri Thomas Tuchel. Drejtuesit e Chelsea dhe vetë sulmuesi e shikojnë klubin e Premier League, si një mundësi ideale ku Broja mund të luajë rregullisht për të fituar eksperiencë.
Por gjatë minutave të fundit, gjërat duket se kanë ndryshuar, pasi Southampton ka arritur akordin me një tjetër sulmues. Bëhet fjalë për Adam Armstrong, i cili shënoi plot 28 gola sezonin e shkuar me skuadrën e Blackburn.
Gjithsesi, pista “Southampton” nuk bie plotësisht për talentin shqiptar, duke pasur parasysh se “shenjtorët” janë një skuadër që luajnë me dy sulmues. Nëse transferimi te Southampton nuk realizohet, Broja ka edhe disa oferta në tavolinë, por Chelsea nuk preferon ta shesë 19-vjeçarin, por vetëm ta huazojë, pasi mendojnë seriozisht se mund t’iu shërbejë për të ardhmen.
Sezonin e shkuar, Broja u aktivizua si i huazuar te skuadra e Vittese në Holandë, ku bëri paraqitje shumë të mira.
