Në kohën kur në Shqipëri çështja e mbetjeve urbane ose plehrave është futur në një debat të ashpër politik për shkak të aferave korruptive, duket se Europa e ka zgjidhur me kohë çështjen e inceneratorëve.
Trajtimi i mbetjeve urbane në gjithë Europën paraqet një sektor shumë të zhvilluar industrial. Ai nis që nga riciklimi, e më pas kapsulimi por edhe asgjësimi në temperatura shumë të larta.
Trajtimi i mbetjeve ka një kosto financiare e cila paguhet nga qytetet apo edhe qeveritë. Kjo kosto është e përkthyer në njësi për një ton. Në Tiranë kjo shifër është 29 euro për një ton.
Kaq paguhet për trajtimin e mbi 800 ton mbetje urbane që krijohen çdo ditë. Së fundmi ka patur shumë debate në lidhje me këto kosto. 10 vite më parë në një projekt të përgatitur nga bashkia e Tiranës, kjo kosto shkonte në 37 euro në total.
Por le të shohim se sa janë këto kosto në disa vende të ndryshme të Evropës. Franca, një nga vendet me normat më strikte në trajtimin e mbetjeve ka një kosto prej 152 euro për një ton mbetje. Austria 87 euro, Irlanda 75 euro për ton dhe Danimarka me 63.3 euro për ton.
Spanja dhe Polonia ka një tarifë mbi 47 euro për çdo ton mbetje të depozituar. Ndërsa vendet fqinje me Shqipërinë, si Greqia, kostot i kanë 60 euro për një ton. Gati 50 euro është kosto për trajtimin dhe asgjësimin e një ton mbetje në Kroaci.
Inceneratori i Elbasanit
Në një deklaratë të saj, shoqëruar edhe me dokumentacionin përkatës, Bashkia e Elbasanit, deklaroi se, që prej vitit 2016 depoziton mbetjet urbane në impiantin e përpunimit të mbetjeve urbane në Elbasan. Më pas në vitin 2017 nisi incenerimi i tyre.
Ky impiant funksionin që prej asaj kohe dhe aktualisht këtu trajtohen rreth 80 tonë mbetje urbane të Bashkisë së Elbasanit në ditë. Por impianti u konceptua të përballonte nevojat e të gjithë bashkive të qarkut të Elbasanit.
Aktualisht, nisur nga kjo, por edhe për të zgjidhur problemin e ndotjes së mjedisit në qarkun e Elbasanit, këtij impianti i janë bashkëngjitur edhe disa bashki të tjera. Aktualisht këtu trajtohen edhe mbetjet urbane të bashkisë së Cërrikut, Librazhdit dhe Përrenjasit.
Impianti i përpunimit të mbetjeve urbane të Elbasanit, është i pari i këtij lloji në Shqipëri. Në kontratën e Ministrisë së Mjedisit është konceptuar që ky impiant, për 7 vite të menaxhohet nga kompania dhe më pas të kalojë në dorëzim të bashkisë së Elbasanit.
Në dhjetor të vitit 2021, impianti do të merret në dorëzim nga bashkia e Elbasanit, e cila aktualisht depoziton mbetjet pa pagesë falë një marrëveshje e cila parashikonte, ndërtimin e impiantit në territor të bashkisë së Elbasanit dhe kjo e fundit do të depozitonte mbetjet e saj pa pagesë.
/GazetaReforma.com/
