Familja Dhimaku në Delvinë është zhytur në zi pas humbjes tragjike të dy vajzave, Elvisës 22 vjeç dhe Rozinës 20 vjeç, të cilat humbën jetën në aksidentin e rëndë rrugor në Sarandë. Dy motrat, studente të Mjekësisë në Tiranë, punonin pa u lodhur për të ndihmuar familjen dhe për të mbuluar shpenzimet e kurimit të vëllait të tyre 7-vjeçar, i cili prej tre vitesh vuan nga leucemia.
Familjarët tregojnë mes lotësh se vajzat, përveç ndihmës në punët e shtëpisë dhe studimeve, punonin në dy punë të ndryshme. Mbrëmjen tragjike, pasi ishin kthyer për t’u çlodhur nga një prej punëve, u nisën drejt Sarandës për të shitur misra dhe prodhime fshati, por nuk arritën kurrë në destinacion.
Automjeti i tyre u përplas me një makinë të drejtuar nga 24-vjeçari Kevi Norra, punonjës i Ministrisë së Brendshme, i cili po lëvizte me shpejtësi dhe në gjendje të dehur. Një parakalim i gabuar i kushtoi jetën dy vajzave, duke lënë pas dhimbje të pamatë dhe një familje të thyer.
“Jetojmë në këtë dhimbje kaq të madhe. Dy çupat ikën, nuk kthehen më. Punonin ditë e natë për kurimin e vëllait. Në Sarandë shisnin misra e gjëra të fshatit. Ato ikën, dhimbjen e kemi”, tregon mes lotësh Shahide, halla e vajzave.
Të afërmit thonë se ende nuk kanë gjetur forcën për t’i treguar të voglit se motrat e tij kanë ndërruar jetë. Ai është larguar përkohësisht nga shtëpia, pasi familja frikësohet se dhimbja e madhe mund të përkeqësojë gjendjen e tij shëndetësore.
“Kërkojmë ndihmë që djali të shkojë në një spital më të specializuar, që të shpëtojë. Po ta marrë vesh, gjendja e tij do përkeqësohet menjëherë”, vijon halla Shahide.
Edhe xhaxhai i tij, Vasil Dhimaku, i cili jeton në emigracion, kërkon ndihmë për të vetmin djalë të familjes:
“Kjo që na ndodhi mos i ndodhtë askujt. Ka tre vjet që luftojmë me forcat tona, sa kemi pasur mundësi. Djali është vetëm 7 vjeç. Ishte shumë i lidhur me motrat.”
Babai i vajzave merret me blegtori, ndërsa e ëma është e përkushtuar vetëm për kujdesin ndaj djalit të sëmurë. Daja i tyre, Servet Dervishi, e përshkruan dramën me dhimbje:
“Dy yje, dy vajza 22 dhe 20 vjeçe, të dyja studente në Tiranë. Prindërit punëtorë, punonin natë e ditë që ato të studionin. Sot kërkojnë ndihmë për djalin e vetëm. Ai nuk di gjë për motrat.”
Një tragjedi e dyfishtë ka goditur familjen Dhimaku: humbja e dy bijave të reja dhe beteja e vështirë për jetën e djalit të vogël. Familja bën apel për ndihmë, që të paktën të shpëtohet jeta e tij.
