Partia Demokratike ka hedhur akuza të forta në drejtim të qeverisë.
Sipas Sekretarit të Përgjithshëm të PD, Gazmend Bardhi, qeveria po e mbulon me spektakël tragjedinë e Thumanës, e cila u ishte një nga zonat më të prekura nga tërmeti i 26 nëntorit.
Bardhi shprehet, se akuzat provohen nga deklaratat kontradiktore të zv.kryeministrit Erion Braçe dhe kreut të Bashkisë së Krujës, Artur Bushit.
Sekretari i PD bën me dije, se demokratët kanë kërkuar llogari për masat e marra nga bashkia, pas tërmetit të 21 shtatorit.
Deklarata e Gazmend Bardhit
“Ka një përpjekje kriminale të Qeverisë për të lënë në harresë viktimat e 26 nëntorit dhe për t’i mbuluar ato me spektakël të pashpirt propagandistik. Ka një përpjekje të Edi Ramës dhe bashkëpunëtorëve të tij për të fshehur të vërtetën se tragjedia e Thumanës ka qenë e paralajmëruar!
2 ditë pas tërmetit, Erion Braçe dhe Artur Bushi japin 2 përgjigje të ndryshme, nëse pallatet ishin shpallur apo jo të banueshme pas 21 Shtatorit. Kjo do të thotë se ata po fshehin të vërtetën, po përpiqen ta shtrembërojnë për të shpëtuar nga përgjegjësia.
Për të bërë drejtësi për 24 njerëzit që humbën jetën nga shembja e dy pallateve, Partia Demokratike ka kërkuar zyrtarisht përgjigje për masat e marra për sigurinë e banorëve nga qeveria dhe Bashkia e Krujës pas tërmetit të 21 Shtatorit. Deri tani, qeveria ka heshtur dhe është fshehur pas spektaklit kriminal të kreut të saj, i cili nuk kursen as fëmijët e mbijetuar. Ne nuk do të heshtim derisa të bëhet #DREJTËSI për viktimat e 26 Nëntorit!”
Tërmeti i 26 nëntorit mori 51 jetë njerëzish, ndërsa u regjistruan edhe dëme kolosale ekonomike.
Kreu i PD, Lulzim Basha bëri thirrje një ditë pas tërmetit që ngjarja të mos shfrytëzohej politikisht, ndërsa ditën e sotme është shënuar edhe akuza e parë e PD ndaj qeverisë.
