Një ngjarje e rëndë tragjike ka ndodhur në Teksas të SHBA, ku 46 persona janë gjetur të vdekur në një kamion. Dyshohet se ata janë emigrantë të paligjshëm, teksa kushtet brenda kamionit ishin të tmerrshme.
Shefi i zjarrfikëseve Charles Hood bën me dije se nuk kishte ujë apo ajër të kondicionuar në kamionin ku vdiqën 46 emigrantët. Gjithashtu ai thotë se ndërsa kamioni ishte një rimorkio frigoriferike, në bord nuk kishte njësi ftohëse. San Antoni, ku edhe u gjet kamioni është goditur së fundmi nga një valë e të nxehtit, me temperatura që arritën rreth 39 gradë.
Sakaq, të 16 të mbijetuarit u dërguan në spital brenda rreth një ore pasi u gjetën, thotë ai. “Ne nuk duhet të hapim një kamion dhe të shohim tufa trupash atje. Askush nuk vjen në punë duke e imagjinuar këtë”, tha Shefi Charles Hood i Departamentit të Zjarrfikësve të San Antonio. Trafikantët e qenieve njerëzore shpesh përdorin kamionë për të transportuar emigrantë pa dokumente, pasi i takojnë në zona të largëta pasi të kenë arritur të kalojnë në Shtetet e Bashkuara.
“Ata kishin familje… dhe me gjasë po përpiqeshin të gjenin një jetë më të mirë,” tha kryebashkiaku i San Antonio, Ron Nirenberg. “Nuk është asgjë më pak se një tragjedi e tmerrshme njerëzore.” Tre persona po mbahen në paraburgim dhe hetimi i është dorëzuar agjentëve federalë. Theksojmë se klima e San Antonios është jashtëzakonisht e nxehtë në muajt e verës, me temperaturat atje që arritën në 39.4C të hënën.
