Një ngjarje tragjike ka tronditur sot qytetin Ahmedabad në Indi, ku një avion pasagjerësh i kompanisë “Air India”, fluturimi AI171 me destinacion Londrën, është përfshirë në një aksident ajror vetëm pak minuta pas ngritjes nga pista.
Avioni i tipit Boeing 787-8 Dreamliner, që kishte në bord 242 pasagjerë dhe anëtarë ekuipazhi, ra në zonën e banuar të Meghaninagarit, duke u përplasur me një godinë që përdorej si konvikt për një shkollë mjekësore. Në momentin e përplasjes, brenda ndërtesës ndodheshin studentë, gjë që e ka rënduar situatën dhe ka shtuar frikën për një numër të lartë viktimash.
Pamjet që kanë qarkulluar me shpejtësi në rrjetet sociale tregojnë trupin e avionit të futur në katin e sipërm të godinës, me dëme të mëdha strukturore dhe tym të dendur që ngrihej nga vendi i ngjarjes.
Sipas të dhënave nga sistemi i monitorimit ajror FlightRadar24, sinjali i avionit është ndërprerë vetëm pak sekonda pas ngritjes, në një lartësi prej rreth 625 metrash. Fluturimi ishte planifikuar të nisej në orën 13:38 me orën lokale dhe të mbërrinte në aeroportin Gatwick të Londrës në orën 18:25 me orën lokale.
Ministri i Brendshëm i Indisë, Amit Shah, ka zhvilluar konsultime urgjente me autoritetet vendore dhe ka njoftuar përfshirjen e qeverisë qendrore në menaxhimin e situatës dhe hetimin e shkaqeve. Nga ana tjetër, ministri i Aviacionit Civil konfirmoi se operacionet e kërkim-shpëtimit janë në vazhdim dhe përqendrohen në evakuimin e të mbijetuarve dhe në ofrimin e ndihmës mjekësore për të plagosurit.
Në një deklaratë të shpërndarë në media, thuhet: “Avioni që u nis nga Ahmedabad për në Londër Gatwick ka qenë pjesë e një incidenti pas ngritjes. Kishim 242 persona në bord. Deri tani, 169 janë konfirmuar të sigurt. Operacionet e shpëtimit po vijojnë për 73 të tjerë dhe druhemi për viktima.”
Kompania bëri me dije se pjesa më e madhe e pasagjerëve ishin shtetas indianë (169), por në bord ndodheshin gjithashtu 53 shtetas britanikë, 7 portugezë dhe 1 kanadez. “Të plagosurit po dërgohen në spitalet më të afërta,” thuhej në deklaratë, ndërsa u bë publik edhe një numër telefoni i dedikuar për familjarët e pasagjerëve: 1800 5691 444.
Kreu i kompanisë, Natarajan Chandrasekaran, shprehu dhimbjen e thellë për tragjedinë: “Me zemër të thyer konfirmojmë aksidentin e fluturimit AI171. Mendimet tona janë me viktimat dhe familjarët e tyre.”
Ende nuk ka të dhëna zyrtare mbi numrin e viktimave, ndërsa hetimet për shkaqet e këtij aksidenti të rëndë po zhvillohen me intensitet nga autoritetet indiane dhe përfaqësues të aviacionit civil.
